كله ماشي

في موضه طالعه جديد ، هي مش جديده قوي بس يعني من كام سنه كده

و هي إن كل لما حد يفكر يعمل مشروع تجاري أو إستثماري في مجال معين و ينجح

تلاقي مصر كلها بتعمله، بسرعة رهيبه و إنتشار رهيب

طبعا مستحيل الواحد يحصر التجارات دي لإنها كتير قوي 

أعتقد ان الموضوع في مصر بدأ بالصيدليات في فتره من الفترات و بعد كده

محل موبايلات، سنترال، نت كافيه، سيبر، ملابس لمركات مضروبه، عصير قصب، ميكروباص و تاكسي، نغمات،

 واحد واقف في اي حته و في جيبه شوية موبايلات و الدقيقه ب 75 قرش، عطور، فراخ،

 ستيراد اي حاجة من الصين و تغريق السوق بيها، توك توك، قهوه و شيشا و  ART

إشتراك وصلة ب 30 جنية تلفزيون و نت، تجارة الأراضي و العقارات

طبعا انا مستحيل أحصر الحاجات كلها لكن معظمها كان في وقت قريب

هي المشكله مش في التجارة، المشكلة في اسلوب التجارة

زمان كان في المدرسة اسمع كلمة ( القطع الجائر للأشجار ) علي إنها يعني أحد مشكلات التصحر

هو قطع الأشجار مش غلط بس مش كده

برضو الأسلوب الجائر للتجارة يؤدي الي كوارث

علي فكره زمان الناس كانت بتفكر شويه عن دلوقتي 

و كانوا مقسمين المواضيع و مظبطينها

كان في حاجه إسمها (كار) 

- ده كار و ليه ناسه أو انا مافهمش في الكار ده أو يابني ده مش كارنا

و الكار كان بيجمع الناس ذات نفس المهنه، و بيكونو عارفين بعض كويس و أحيانا كانو يقفوا جنب بعض في الشده

نرجع تاني

الغريب ان بالرغم من ان الأنواع دي من التجارة بتبداء كويس قوي و تنتهي بمأساه

إلا إن الناس مصرين علي  هذا الأسلوب من التقليد الأعمي الغير مدروس

في ناس هما اللي بيبدؤا المواضيع الجديده و طبعا هما المستفيدين في الأول

و في ناس كله ماشي، يشوف ايه الجديد و يمشي وراه، و ساعات بيخسروا كتير

و مستغربين قوي ليه ده بيحصل................. غريبه فعلا