بنت
حبيبتي بصي انا جبتلك ايه؟
ايه ده يا ماما؟ بيبي؟
لا يا حبيبتي دي عروسه
ايوه يعني اعمل بيها ايه؟
دي علشان تلعبي بيها ، ممكن تسرحيلها شعرها و تلبسيها هدوم جميله علشان لما تكبري و تتجوزي ويبقي عندك بيبي، تعرفي تخدي بالك منه.
طب وانا هاتجوز امتي؟
هههههههههه مستعجله علي ايه
ماما
نعم
انا عاوزه اطلع رحله مع صحابي.
مفيش رحلات
ليه بس يا ماما، ما صحابي كلهم طالعين
هما يطلعو هما حررين انت لا
يووه انتي هتفضلي تقولي لا لحد امتي
لما تبقي تروحي بيت جوزك ابقي اعملي اللي انتي عاوزاه
ماما انا رايحه عيد ميلاد داليا انهارده و احتمال اتاخر
هتيجي امتي؟
يعني علي الساعة ١١ كده
٨ تكوني في البيت
٨ ايه يا ماما بس العيد ميلاد اصلا هيبدا ٩
لما تروحي بيت جوزك ابقي ارجعي انشالله الفجر
ماما انا عاوزه اغير مكان الانتريه
لما تبقي تروحي بيت جوزك ابقي حطي الانتريه في البلكونه
ماما هو ال..
لما تبقي تتجوزي
ايوه اصلي ال..
لما تبقي تتجوزي
بعد الفرح
ياااه اخيرا بقالي بيت و هعمل اللي انا عاوزاه
بعد كام شهر
انت فين؟
انا في الشغل؟
ايوه هتيجي امتي؟
يعني شويه كده
و بالنسبه للبنيادمه اللي مرميه في البيت؟
في ايه بس يا حبيبتي ما انا هخلص شغل و اجيلك
فيه انك مش حاسس بيا ولا فاهمني ، ماما عمرها ما زعليتني و بابا عمره ما خلاني عاوزه حاجه
طيب بس اهدي و نتكلم
ممكن تقولي انت لازمتك ايه؟
نعم؟؟؟!!!
انت لازمتك يه في حياتي؟ قوللي؟
همممم
بعد الطلاق
انت يا زفته قومي روقي المطبخ
يا ماما سيبيني في حالي لو سمحت
يعني لا فالحة في جواز ولا شغل بيت
ماما
رايحه فين
خارجه
هاترجعي امتي؟
ماما انا مش صغيره
لا يا حبيبتي بس مطلقه، انت عاوزه الناس تاكل وشنا
ماما انا مايهمنيش الناس
بس انا يهمني لما تبقي تتجوزي ابقي اعملي اللي انتي عاوزاه
تعليقات