انا مش هاتجوز
هي : انا ليه ما فيش حد بيتقدملي , كل صحباتي اتجوزو وخلفو و انا لسه
هي : انا شكل عمري ما هاتجوز اصلا
هي : ما فيش حد راضي يعبرني
هو : بقولك ايه , انا قررت انني اتجوز
الصديق : تمام و في حد ولا بتدور
هو : والله انا ما اعرفش حد بس كنت بافكر في فلانه و انا شايفها حد محترم و اعتقد انها هتكون زوجه مناسبه
الصديق : والله هي الناس كلها بتقول انها جدعه و بيشكرو فيها
هو :بس انا ماعرفش هي مرتبطه ولا لأ
الصديق: ممكن تسأل صاحبتها هي اكيد عارفه
هو : ايوه انا هسألها
هو : كنت عاوز اسألك علي حاجه
الصديقه : اتفضل
هو : هي فلانه مرتبطه
الصديقه : لا مش مرتبطه ولا حاجه
الصديقه: ليه يعني في حاجه
هو : لا بسأل بس
الصديقه: علي فكره فلان سأل عليكي
هي : يعني ايه سأل عليا
الصديقه : يعني سألني اذا كنتي مرتبطه ولا لا
هي : بجد
هي : ايه ده بجد
هي : تفتكري بيسأل ليه
الصديقه : هيكون ليه يعني , شكله معجب
هي : بيا انا. يمكن بيسأل عليشان حد تاني
الصديقه : لا بيسأل علشانه هو, كان باين عليه قوي
هي : الواد قمور قوي, ده انا جامده بقي علي كده
هي : يبقي لازم اتقل عليه علشان ما يحسش انني مدلوقه
هو : انا كنت عاوز اتكلم معاكي شويه
هي : اه طبعا اتقضل
هو : انا شايفك حد كويس و محترم و كنت عاوز اتقدم لك
هي : والله انت حد محترم بس انا مش بفكر في الجواز دلوقتي ( ايه اللي قلته ده)
هو : خساره, عموما ربنا يكرمك و يوفقك
هي: فلان سالني اذا ينفع يتقدم لي
الصديقه : بجد مبروووووك
هي : انا قلت له انني مش بفكر دلوقتي
الصديقه : ايه
هي : بس هو اكيد هيجي تاني صح
هي : هيجي تاني صح
الصديقه : .
بعد كام يوم...
هي : هو ما كلمنيش ليه؟ لو جه هاقولو موافقه علي طول. كفايه تقل كده
هي :لا انا مش قادره استني انا لازم اكون ايجابيه , انا هاروح اكلمه
هي : صباح الخير
هو : اهلا ازيك صباح النور
هي : ايه الأخبار
هو : تمام الحمد لله انتي اخبارك ايه؟
هي : انا كويسه
هو : اتفضلي شكولاته
هي : مرسي
هو : انا اصلي خطبت امبارح
هي : مبروك
هي : بعد اذنك
هي : ده خطب واحده تانيه
هي : هو انا وحشه قوي كده
هي : انا شاكلي مش هاتجوز
هي : كل صحباتي اتجوزو وخلفو
تعليقات